قٌوم واتحرك
==========
قوم اتحرك وانسي امبارح
بـدِّل حزنك بشجر طارح
ليه راح تجري علي الأوهام
ليه بتخاف تبقي لقدام
حتي لو أنت هجرت أحلام
خلي الفرح ف بحرك سابح
إيه آخرك لو عشت حزين
أو خليت الأبيض طين
طعم السعد هيبقي ضنين
وعمر الخير ماهيفضل طارح
تقدر يوم تمشي وتتغير
تقدر تضحك وماتتحير
بس الوعد إنك تتصبر
علشان فجرك يفضل بارح
غـيـَّر ريشتك والألوان
علشان طعم الفرحة يبان
افتح قلبك للخلان
تفضل راضي وفكرك جامح
خلي ورود الحلم تلالي
عيش أحلامك إحساس عالي
إوعي تروّح إوعي تطوّح
بكرة الحلم ميبقاش عادي
ازرع سِلْم ف كل بيوت
رجَّع تاني شجر التوت
ارسم فرحة بنسمة وطرحة
واوعي تخلّي الحلم يموت
==============
من ديوان أيام الحرية
كلمات أبوالحسن بن حسن بن عكاشة
