(
،،،،،،،،،،،،،،،،،،،،
شعر "محمود العيسوى "
ورا كل سور لجنينة زاهيه بتترعش
من هوا الحواديت
واحد بيحلم يرتشف ريق الزهور
يكسر قواعده وينتظر
من الصبح للمغرب
يروى انتظاره بالامل
يصبر قوى
علشان خطاوى المحتمل
يمكن يعدى بلهفته
فيكسر الاشواق
ويحن ع المكسور
ورا كل سور
كام مصطبة الشمس عامده تظلهم
فبتكتر الحكايات
والبكره مستنظر دفا
يتلف فى الخلقات
ويلف فى الحلقات
يحفظ قصايدى هناك
ويبص من حواليه
على بيتهم المهجور
ورا كل سور
فى المعهد الثانوى
صوت الغناوى هناك
ملفوف بعمتنا
وبنية بت حلال ندهت بصوت عالى
صلى صلاة العشق
لاجل اما تهنالى
وسيجارتك المدسوسه
من ناظر المعهد
خايف تسيبها تغور
ورا كل سورة
من قهوة العواجيز
روحك تمل الميل
والخطوة محسوبه
هى هتيجى نروح
ولا امشى بالدمعه
لساها سارحة فى السما
بتخبى عينها لتتكسف
والشوق بانغامنا يثور
و را كل سور
من دعوة قضاء الحلم مرفوضه
تجرى تصلى الضهر
تتقطع المسافات
ترجع تغنى قصيده
تحكى عن الايام
والخنقه ساعة الليل
والوحشه للغايبين
وضياع رباط النور
ورا كل زنة سور
مع نكسة الميادين
وضياع عيون الواد
ونشيد رعاة الزين
مليون طبور وطبور
بيهدو فى الاسوار
تصرخ تموت تنداس
تشرب كفاك م النار
ورا كل سور حواليك
حلم الزمان ينهار
