سألوني أهل الهوى
سألوني أهل الهوى درب السعادة منين ؟
قلت ابحثوا في القلوب هتلاقوا حب دفين
عايش ما بين البشر هيمان بقاله سنين
يروي قلوب العذارى و يحرك العاشقين
يخلي أجمد ولد تايه شمال و يمين
أصل الحكاية طويلة و بتحير العاقلين
قصص كتير في الغرام معروفة للملايين
زانت تاريخ البشر و شافوها رأي العين
ممكن أنا أعدها لو كنتم لها ناسيين
رومبو و جوليا و بثينة و جميل جروب حلوين
ولادة و ابن زيدون و عبلة و العبسي
و قيس و ليلى و كليو كانوا الجميع عاشقين
و في التاريخ الحديث يا ما كتير مساكين
غاصوا في بحور الهوى و بالجمال مفاتين
منهم كتير سعداء و في النعيم عايشين
عرفوا دروب الهنا و عاشوا حنان و حنين
ذاقوا النعيم و السعادة و في بعضهم دايبين
و اللي ما زار قلبه حب يعيش حياته حزين
مهما يجمع في مال تبقى سعادته أنين
ارحم يا رب البشر و اجمع بين العاشقين
كلمات الشاعر المصري / محمد العراقي
