مجلة أضواء المدينة - وانت طفل - الشاعر عبدالله الهوارى

وانت طفل كان يا ما كان ف سالف العصر والاوان كان حلو الزمان كنت تشوف الحاجة وتشبط تجيلك ف غمضة عين وان ما جاتش تمثل وتعيط تجيلك ف ثا نيتين وتحلم حلم متلخبط قوام قوى يتفسر تشبع منه وتتنطط ويمكن يجيلك اكتر هو وفوق منه اتنين وتلعب مع بنت احلامك ولعبك يقلب قصة حب تكبر وتكبر قدامك وتيجى الدنيا بعدين تفرق بين قلب وقلب وتقابلوا بعض اتنين تانين تمنعكوا من الكلمة حاجات وتتحول ذكرى حكايات سنين الحب واللعب ويفضل سرك ف بير تعالى بقى وانت كبير وانت شبل تاخدك الدنيا وتجيبك وتقولك انا بختك ونصيبك وتشيط فيك ولا تسيبك وتحرمك من اى حب وتحرمك حتى م اللعب تحلم تقولك دا كتير ولا تعرف حلم ولا تفسر كانها عليك بتغير وتمشى وراك وتقصقص وتدى سرك لكل الناس وتقولك انت كبرت خلاص تكلفت حكياتك وتلخص ترجع سرك تانى ف بير وتكبر بقى وتشيب ما لكش ف الدنيا حبيب راضى بمكتوبك ونصيب شوف وانت كهل تفتكر شبابك وتتحسر وتقول يا ريت كنت اقدر ارجع تانى صغير واحب بقى واتحب وادوب ف الحب واشبع لعب والحياة لسة قدامى واحقق كل احلامى وما جربتش لسة الامى وتقول للدنيا يا دنيا امانة عليكى انا عايز ارجع طفل وتخلى السر ف بير