اربع عيون
اربع عيون ف المراية
وانفين واربع فتحات
واربع شفايف مضمومين
نسيوا معنى الابتسامات
واتنين جبين واربع خدود
غرقانين ف بحور الدمعات
و شقوق كتير ماليهاش حدود
بيساووا عدد الحكايات
حتى الودان بقوا اربعة
والذكرى جاية مسمعة
للروح تروح مرجعة
تغرق ف بحر السكات
والايدين لو رفعتها
القى الصوابع ملهاش عدد
مرتعشة وطالبة المدد
وضاع الصبر والجلد
ف زمن ضيع الحاجات
والصوت ضايع والصدى
دايب ف بحور المدى
تايه ف احضان الفضا
ملفوف ف اكفان الاموات
وصورة الرفوف ف القفا
بتطلع ف المرى قدام
عليها الاحلام متكتفة
ومترتبة فوقها الالام
واى سؤال بيتسال
يترد عليه بسؤال
اخر كلامه بيتقفل
بنقطة وعلامة استفهام
