فى قلب الذكريات
عدى سن السبعين
وكانه لسه ف ثانوى
مع انه مجتهد وفالح
محطوط ف لستة المشاغبين
الاسم اسمه سعيد
واللقب لقبه صالح
واخد الشغب دور بطولة
وكعبله كعبلون ف كعبلون
الضحك منه فيه
لو رجلك خدتك للسيما
او كسلت وفتحت التليفزيون
تضحك ضحكة عليها القيمة
لو شايل طاجن ستك
ومضايق قوى ومحزون
تضحك قوى وتفرح
لما تشوف العيال كبرت
وتحس انك الزناتى وسبع
وتسقط الاحزان ف بير سبع
وتضحك ضحك مضمون
كلمنى صاحبى ف التليفون
وقالى سعيد صالح مات
قلتله شممتوه الفلوس
قالى شممناه ما صحيش
رغرغت عنيا بالدموع
وقلت يا عينى ما تبكيش
اصله من اللى بيموتوا
لكن بيفضل ويعيش
ف ضحكة حلوة وافيش
بتعيش ف قلب الذكريات
