كما الدومية
نتعاتب وخلي الباب موارب
جايز تقسي في كلامك
جايز المر في عتابك
جايز تصعب عليك نفسك
وتفلت منك اعصابك
صحيح قالوا جناحي مكسور
وبتحمل كتير أمور
والايام لازم هتدور
وتظهر كل افعالك
واسامح مره والتانيه
وغلطك ثانيه ورا ثانيه
وعايشه معاك كما الدومية
كلام معسول لكل الناس
وعندي نار وحاميه
تميل للانثي ميل العبد
وعطرك تحت اقدمها
ولو كان حتي تراب الارض
وألف انثي بتساير
وعامل ليها جمايل
ولاجل الود يدوم بينكم
تحايل فيها وتساير
واقول اصبر جايز يتهد
جايز لحظه لعقله يرد
عشان ترضيني بخداعك
فتحت ألف حساب علي النت
تعاكس مره وتغازل
في ألف ألف حرمه وست
وفاهمه واقول جايز يرجع
جايز عقله لرأسه يرد
دوميه وقاعده معاك في البيت
باقي مسمار واكون علي الحيط
رابط في أيدي ورجلي
عصايا وفيها شادد خيط
تشغلها ساعة ماتحب
وترميها في كناسة البيت
واتحمل واساير
مع الحاصل والساير
لكن يظهر
مشلتش ليا جمايل
وعايشه معاك كما الدوميه
وغلطك ثانيه بثانيه
هتاخد ايه من الدنيا غير الاوهام
متفرقش بنات حواء
بين الوحشه وبين حلوه
وبين اللبس والزينه
ولو كانت في فترينه
غير الكلمه
ووش بشوش يضحكلك
وحضن حنون يقابلك
يشيل الهم عن كتفك
وانا من يومي معهداك
علي الاخلاص
ايه يفرق بيني وبينهم
وانا معهداك علي الاخلاص
