الزمن دوار
الزمن غدار
وطبعه غريب
والدنيا بتاخد ما بتديش
وطبعها يحير
ضرية تصيب
والف ضربة تخيب
والعمر فات
وانا نفسى ف حاجات
حاليا مش حقدر اعملها
عشان كده نفسى
ارجع تانى صغير
اتعلم من اول وجديد
وارجع ف صفوف التعليم
والبس كل يوم واغير
واشيل شنطى
فيها كتابى وقلمى وكراستى
واروح مدرستى
كل يوم اروح متاخر
والسبب التسريحة
ما كانتش راسى بطيخة
اساسا لون شعرى اصفر
كل شوية اغير تسريحتى
وف الاخر اسرحها
تسريحة حليم
ما انا واد لعيب
الم صحابى ونروح نلعب
ماتش ظريف
العب ونفس الوقت معلق
واقلد كابتن لطيف
ويسالنى ابويا عن حالى
اقوله تمام
انا قاعد ف الصف ال قدام
انا من المتفوقين
وانا بقلد عادل امام
ف دوره ف مدرسة المشاغبين
وامى تعمل لى اكل خصوصى
وارجع البيت متاخر سا عتين
واقولهم كنت مع صحابى
باذاكر دروسى
واقولهم خلصت فلوسى
يدونى كتير
اقول قليل
يدونى بزيادة
واروح اشترى اخر البوم
نزل السوق لميادة
اه لو اقدر ارجع الايام
وارسم تانى الاحلام
اه يا سلام
لو كنت اقدر
ارجع تانى صغير
نشرت فى 19 يوليو 2014
بواسطة adwaeelmadina
عدد زيارات الموقع
39,994