فوق الناقة شبرية
شايلة جواها قلبي 
وروح عياها الوجد
وجسد هزيل فى صورة ملاك
والبنت مصرية
بنت الجنوب
شردت بيها نياق الريح
والقلب قرّب يدوب
خايف من ليل البعد 
يصبح جريح
لا جفن عينى نام
مع إن الجسد 
فى فراش الشوق أصبح طريح
لكني هنا فوق بركان الصبر
حلفت أبنى لجسدي الهزيل ضريح
بين ركاب العير 
قلبي فى مكانه أنّ
وبين أسراب الطير
حامت روحى يمكن هواها يحنّ
ونوح الحمايم وشجو العصافير
ودمعة سالت رتلت كلامى فنّ
وقالوا كلامى صورة شعرية
من قلبين ودابوا جوا شبرية
الكل شايف كلامى شعر
حروف منظومة تبيانِ
أتارى حروفي بقايا عمر
نظمته من دم شرياني
ما كان فى الصورة دمعتي
ولا فرط أحزاني
ولا حبيبة غابت من حواري القلب 
دوّبت صهد أشجاني
و ما قالوا حبيب مفارق 
رحلت حروف القلب ويّاها 
.فوق الناقة....جوا شبرية
خالد العطار