(بحبك موووووووت)

واللهي بحبك موووووووت
حقولهالك بعلو الصووووت
وعاشق نخلك العالي
وسجر التووووووووووت
بحب القمح في سنابله
وعمي صميده لو اقابله
في غيط محرووووووت
بحب البحر والميه
واحب ايزيس معديه
وسنارتي بخيط مربوط
وعاشق مزلقان مقفول
وعطشقي ينادي يقول
اوعى القطر توت تووووت
بحب الشمس في بؤنه
بنارها الحاميه مجنونه
ونسمة عصر لما تفووووت
وقعده في ضل صفصافه
وبنت شقيه خوافه
وفنجان قهوتي المظبوط
بحب البرد في طوبه
وقصعة عدس مشروبه
والبالطو اللي كله خطوط
بحب الطينه بعيالها
واحب الصحرا برمالها
وحجر منحووووووت
بحب شيوخك العارفين
واللي للودع ضاربين
والقايلين كمان اشتوووت
بحبك زي مانتي كدا
وشاريكي وعمري فدا
ولو كان التمن بالمووووت
بحبك موووووووووووت
******************************************
محمود ناصر