ياتعبانين بالقوي قوي ياحنا
تعبنا كتير مافى يوم إرتحنا
والكرابيج نازلة على ضهورنا
بالأحضان تحضن في جراحنا
ياريح الهم ياهبة علينا
يابحر وموجو مغرق فينا
إدونا فرصة ناخد في نفسنا
وبعدها كملوا تلطيش فينا
جيتي كتير يادنيا علينا
نارك كوتنا كفاية إستوينا
مش قادرين نستحمل تاني
مدي إديكي خدي بإدينا
يادنيا بتعملي فينا كده ليه 
يادنيا قولولنا ذنبنا إيه
إذا كنا غلطنا يادنيا في حقك
حني علينا إعفي وسامحينا
إمتى الهم يروح ويسيبنا
إمتى الفرح بسهمه يصيبنا
ولا عذابنا إستعذبتيه
وطايرة من الفرحة لأنه نصيبنا
سامحنا يارب الدنيا خدتنا
خدتنا إديتنا على دماغتنا
توبنا يارب وعدنا إليك
إقبلنا عشمنا كبير قوي فيك
إرضى علينا يارب العزة
هنعمل بس إللي بيرضيك