من يوم ماسبت البلد 
وانا يابنى عيانه 
وحالى حال المرار 
وان كلت بتآيه 
حاسه بقرب الأجل 
تعلالى ياضنايه 
-----------------
عايزه اموت وانت
موجود هنا معايه 
وكفايه غربة سنين 
ارجع بقا كفايه 
واسمع وصية أم 
ماشيه ومش جايه 
----------------
حادى على اخواتك
خليك ليهم آيه 
وازرع حلال فيهم 
تحصد خير ماله نهايه 
واياك وفعل الشين 
تفضل ليهم رايه 
-----------------
واوعاك وقول الزور 
ده الحق له غايه 
والظلم يوم الدين 
ظلمات ماله نهايه 
لو راح تموت للحق 
الفخر ده كفايه 
-----------------
بين السما والارض 
آيات كتير ياما 
شاهده بأن الله 
أول ماله بدايه 
سبحانه واحد صمد 
آخر ماله نهايه 
-----------------
انا هختصر يابنى 
لتقول دى رغايه 
وعجوزه بتخرف 
فى كلام ماله غايه 
انا عقلى لسه سليم 
وكلامى فيه آيه ؟
-----------------
شرق وغرب بكيفك 
لساها حليانه ؟
واتنين ماتقربهمش 
فيهم الهلاك ياما 
الشرك بالله 
وضرر الناس ياضنايه 
-----------------
واخر كلامى ليك 
ابقى افتكرنى وابوك 
واقرا لينا الفاتحه 
علمتها انا ليك ؟
مقاطيع ببطن الأرض 
مقاطيع صالحنا فيك
بقلم - ياسر فؤاد -