( اغنية وانا مالي)

وانا مالي ياقلبي وليه اللوم
وليه تشكيني وانا المظلوم
مش انت اللي هويتها وحبيت
وانت اللي عشقت وطبيت
وانت اللي بتحزن وبكيت
لو ملمحتش طيفها ف يوم
وانا مالي ياقلبي وليه اللوم

وانا مالي ياقلبي انت المسؤل
انت اللي بدأت معاها تقول
كنت فاكرها حتدوم علي طول
علي حبها كنت تنام وتقوم
وانا مالي ياقلبي وليه اللوم

بتلوم ع العين وانت الجاني
انت اللي رميتها ف احضاني
وانت اللي خليتني اعاني
جي تلومني ياعيب الشوم
وانا مالي ياقلبي وليه اللوم

بتلوم علي ايدي من لمسه
وشفايفي لو همست همسه
بتقولي خلاص لازم تنسي
مقدرش انساها واعيش محروم
وانا مالي ياقلبي وليه اللوم

متلومش عليا ياقلبي سماح
انا كنت ف حالي عايش مرتاح
ولا يوم فكرت اكون سواح
خدتني ومشيت في طريق محتوم
وانا مالي ياقلبي وليه اللوم

************************* 
محمود ناصر