خواطر وشعر مراد مصطفى
4 ساعة
واحد من الناس
بردان وراضى وفرحان
وايه يعنى أنام فى اى مكان
يتيم وواحد من الناس إنسان
ومنسى وضايع وحيد غلبان
معاكم وف وسطكم
مش أثر من تاريخ وزمان
ما هو انا لو أثر كنتم حفظتم عليه 
وخلتوه فى امان،،،،،
وعملتم حواليه ديكور جميل ومسرح
وأضواء تبهر عيون وموسيقى وفرح ألحان،،،
لكن لما الصورة تجرح قلوب وتبكى عيون
تدارى بسرعة وتختفى ما تبان،،،،،
ياسلام نعمه وغنى وجمال 
ولا بينا واحد ضعيف هلكان،،،،،
اوعى تجيب سيرة لحد خالص
عن وجعى وحيرتى طب ليه بدون سبب علشان
انا اثر بس من الوجع والمر
وابنكم وليد الاحزان،،،،،
ما هو لما الضمير يموت ويغيب الاحساس
ودموع الرحمه تجف ورجلى من نعلى تبان،،،،
يبقى العوض على النفوس
والقيامة خلاص ووقت صلاة الجنازة على القلوب حان،،،،،
ابنكم وابن الوطن من دمكم والنيل
مرمى فى الليالى وعل الرصيف طفل 
سقط من عطفكم و هان،،،،،
لو ما نزلت من عنيك دمعة عليا
فى البرد والعتمة يبقى ضميرك سافر وخان،،،،
يا ابن آدم لو كان فى صدرك حجر
كان حزن ومد ايده للبرائة وحن ولان،،،،
أنا راضى بقسمة كريم اللى ارحم من قلوبكم
معدوم الأم والأب وبشوش ومتبسم ومش زعلان،،،،،،
ومش غريبة ولا حاجة أكون كده بينكم وحيد
لان المشاعر والوفا والرحمة رحلت وقد كان،،،،،
وانا صورة هنا فى الطريق لغروب الدموع 
وصرخة من ألم الحياة وبركان،،،،،،
بقلم مراد مصطفى مراد