*********يوم ميلاد النبي ***********
  محمود عمارالزلباني
الطير على الغصون فرحان 
لأن ام المصطفى حامل 
بسيدنا النبى العدنان 
صاحب الجمال كامل 
ـــــــــــــــــــــــــــــــــــ
من اّدم النور منقول 
موجود بأطهر خلايق 
وغير الصلى ما نقول 
على سيد كل الخلايق
ـــــــــــــــــــــــــــــــــــ
لما كان يوم الميلاد
رقصت طيور البراري
والفرح غطى وزاد
والكافر قال يا مراري
ــــــــــــــــــــــــــــ
راضع لصدر حليمه 
اتربى وسط عيالها
راجل قوى الشكيمه 
كتر الخير لما جالها
ــــــــــــــــــــــــــــــ
سليم والعود مفرود
وربه عينه تصونه 
كفه بالخير ممدود
والكحل زاين جفونه 
ــــــــــــــــــــــــــــ
معروف بصادق امين 
الصدق مالى فعاله
حبيبنا ليه ام ين
اّمنه وحليمه قباله
ـــــــــــــــــــــــــ
الكلمه منه دواوين
يحتار فيها المناظر 
عارف لينا الدوى وين
ولا عمره كان شاعر 
ـــــــــــــــــــــــــــــ
جاله الجمل شاكى 
الحمول تقلت عليا
بدمع العين باكى 
نجينى يا خير البريه
ــــــــــــــــــــــــ
ـجزع النخيل يبكي
لبعد النبى عنه 
لمين يا حبيب اشكي 
ما خيب للجزع ظنه 
ـــــــــــــــــــــــــــــ
نبى يدعى للتوحيد
ربى ما لوش تاني 
يدعى لرب مجيد
الله باقى ما هوش فاني
-------------------
عليه اتوحدوا الكفار
ناوين الازى للزين 
محمد نبى مختار 
ساكن فى نن العين
 ***محمودعمارالزلباني