بــــــــــــر و ا ز
.....................
لميت عفش الروح الدايبة
على كراكيب البدن الضايع 
ع الأسفلت
حطيتهم ...
صورة ف برواز
ورسمت إطار ..
بالخط المـُدهـَب
دقيت المسمار فى الحيط
كـِملـِت صورة قلبى النازف
دقاته بتجرى وتتنطط
رافضة تكون محبوسة ف صورة
حاكمها إزاز
ما لقيتشى دبارة 
تتحمل تقل الوجع الساكن فيها
صورة أبعادها أكيد حقيقية
دم ما لوثتوش الميـَّة 
عامت كل الصورة بعفش الروح
وعطش البوح
فى الدم النازف
وتدور على
شط الأمل المتدارى ف رمش عنيكى
تيجى تقــرّب ...شـَطــّك يبعد
تجرى وراكى تبوس فى إديكى
وتبعتر نبضات القلب الدايب فيكى
على خطاويكى
وانت الماشية بضهرك لسة
ولا بالصورة ونزف الصورة 
عارفة وحاسة
عمر ما كان من طبعك خـِسـّة
إيه اتغير ؟ ..حاجة تحير 
قلبك عمره ما كانشى صغير
ولا كان جامد ولاكان قاعد 
ولا كان مرة غبى وبيعاند
كان طير فارد
ع الكون كله جناحه ومادد
إيده شواهد
شادد قوس على طرفه حياة
ياااااااااه
الصورة اتكسرت ..
إتلاشت ...
بهتت ........... باشت
كل الصورة بقت لون واحد
محبوسة ورا كسر إزاز
..............
بـــقــــلــــــــــم ا لــــشـــــــا عـــــــــــر 
أ بـــــو عـــــمـــــــــــــا ر ا لـــمـــصــــــــــر ى