افتح 
شبابيك احساسك
وف اول سطر
ف كراسك
اكنب 
كلمة وطن
وشد الكلمه
لاخر سطر
وافرد باقى حروفك
ضله
قايمه تصلى 
صلاة العصر
وبتغمز للموجه
السارحه
وبتغزل
لصبيه الطرحه
وفراشه واقفه بتتمايل
على رمش النخله
أم جدايل
والناى ع الشط بيتحايل
على غنوه بتنعس
على عوده
والنغمة بتعدل
ف المايل
افرش ف حروفك
وان خلصت
اتهجا حروفك
من تانى
واغزل من قلبك
كام نبضه
وألضمها
مع النجمه الفضه
راح يصحا الفجر
ويتوضا
ويِصبّح
على وش المدنه
الارض تِسبّح
وتشقشق
وطيورها
من خيرها تزقزق
والليل بيكحل
ف الشارع
والحاره
بتحرس فى ولادها
والقمرة
بتولد ف ميعادها
أحلام الناس 
الشقيانه
والحلم الاخضر
راح ينشف
لو غاب العدل 
فى كراسك
افتح 
شبابيك احساسك
وف اول سطر
ف كراسك
اكنب 
كلمة وطن
وشد الكلمه
لاخر سطر
*****************************************************
كلمات الشاعر / سليمان صالح احمد