حبلانة يا كلمة وجع
والآهة ولادة
والجوع بقى يساوى الشبع
والظلم واخد سكته ف شكل 
العبادة
فبلاش تهزى جذع نخلك 
ع الملأ
فين الرطب ؟
يا ام الخـُـطب
لحم السما عريان 
وانا اللى مادد من شرايينى 
غطا
لجلن يوارى سوءتك
حلم الفقير طاش فى الميدان
والضحكة هاجة 
من شفايف كان
يراودها الأمل
هاجة الحروف 
من فوق سطورى
هج النفس 
من صدر كاتم للوجع
هج القلم 
ولا عادشى قادر يرسم
التباريح بدع
واقولك ايه ؟
ما تيجى نقرب المسافات
ما بين بيننا
وتفتلى خطوة بإديكى 
وانا اغزلها 
ونتلاقى
بقى لنا سنين بنتوازى 
ونتحازى
وعاملة أم بالكلمة
وانا الراضع لبن برانى 
خالى الطعم ..خالى اللون
زمان ..كنا بنتكاتف
بنتحالف على الشياطين
ولو كانوا فى جحر الديب
زمان ..كان الغرام بيننا 
فاتح سراديب
على قلوبنا
زمان الغيرة كات تاكل
فى قلب قلوب بتحسدنا
وقولى إيه حصل بيننا ؟
.............
بــقـــلـــــــم ا لـــشـــــــــا عــــــــــر 
أ بـــــــو عـــمــــــــــا ر ا لـــمــــصـــــــــر ى