رسالة لا تنسيني
احمد صبري
-
مين هيلاقي راحة
وبإيده يختار التعب
و عيونك لو جراحة
عيوني هي السبب
حبيتك ايوه مانكرش
قولت لك وماخبيتش
سامحيني كنت بحلم
احلام و مابكملش
انتي حروف القصيدة
وانا مش قادر اكتبها
لسه المعاني عنيدة
مش عارف اجيبها
متقوليش اني براحتي
وانتي عارفة راحتي ايه
انتي حسيتي صراحتي
حبي ليكي بتسيبيه
وانا كمان مصدقك
مصدق اشواقي الكتير
مش هاقول لك اعشقك
واحنا بينا اختلاف كبير
كفايا ان انا عايزك
تبقي حكاية زماني
مقدرش اكون بحبك
واشوفك مش عايزاني
دا الفرق بين وبين
قلب بيموت م الالم
وقلب عايش حزين
خايف اسير الندم
عرفتي ليه يا حبيبتي
نفسي بقى مقطوع
انا عايزك بس انتي
شايفة الطريق ممنوع
واوعي تلومي نفسك
ليكي انا ودفاعي
انا معرفتش امسك
نفسي خدني اندفاعي
مفيش داعي تواسيني
وانتي عايزة اللي يواسيكي
رسالة لا تنسيني
من واحد
بيموت فيكي