على خد ستارة شباكى
النسمة أم جدايل وردى
وحِلقان من نور
بترش الضحك
أم شرايط
داير ما يدور
بتصحِى الشمس النعسانه
على كتف السور
وطيور م الجنه
بالحنه
بتنقش فى الكون
بتذوء ف سمايا
وأرضى
وتزقزق على صدر حنون
أنا شايف ف عنيكى الدنيا
بفينكه وأُصه ع الأُوره
سنيوره ماشيه بتتهجا
ف الخطوه الحلوه
المسحوره
والورده
بترسم ف خدودها
وعبيرها
طارح على عودها
والليل
ع الرمش بيتعطر
والكحله
ف عينه بتتمخطر
الله ع الدنيا
يا حبيبتى
ف عنيكى
أحلى من الصوره
أنا شايف
ف عنيكى الدنيا
بفينكه
وأُصه ع الأُوره
**************************************************
كلمات / الشاعر سليمان خطاب ( سليمان صالح احمد)