حمدى موسي

‏٣٠ أكتوبر‏، الساعة ‏١٢:١١ م‏ · 
لدرجة إني والله ماعارف أقول 
أنا عاجز عن التعبير
وحتي حروفي مكسورة
وواقفة مفيش لها همة 
ولا تفسير ولا صورة
ولاعارفة تكون معني ولا عارفة تكون كلمة 
عشان اشرح لك الحالة
دي مش محتاجة لقواله
ولا كلمات ولاخوتة
وحيث انه مهوش ممكن لقاء الحي بالموتي.....لقاء قمة
إذن يامه 
مفيش غير اني لازم اموت
ف قابليني 
أنا قربت م النهايات
حاجات وصلت ولسه حاجات
عنيا خلاص بقت علي وش واحد مات
وقلبي يادوب بيتمحك ف بعض ساعات
ورجليا بقت والقبر
والضحكة عشان الصبر
انا والله يا حبيبتي 
يادوبك شبر وابقي هناك
ياريت يامه تلاقي ملاك يكون طيب 
يخلص لي الورق علي طول
يوريني طريقي منين 
انا عارف بان الجنة ع الجهتين
وان النار لناس تانية
لناس عاشت لكن مافتتش ع الدنيا 
وانا يامه واهو انتي واحدة 
م العارفين
بإني كنت بني آدم ومن أحسن فصيلة طين
انا طمعان ف باقي الرحمة
كل التسعة والتسعين
خلاص الجزء جاب آخره 
خلاص مصوه
معادش الدم فيه نخوة
معادشي الأوو بتدي الأوو 
خلاص يامه
هنا قامت قيامة الحب
هنا قد جاءت الطامة
وكله عذاب
هنا فتحت جهنم فرع
له برضو سبع أبواب 
عشان الطمعانين ف العدل والأحرار 
وباب تاني عشان الثورة والثوار
وباب الأدبا والشعرا 
وباب العلما والأفكار
وباب اللي بيتمنوا يشوفوا نهار
وباب مخصوص عشان اللي يقول الحق يتاخد ويتقطع بغيلة وغدر بالمنشار
دا باب عالي عشان السهرانين للحب
باب للي بيملك قلب 
باب أهل الطريق والخطوة والدراويش
باب اللي بيخبز عيش عشان الفقرا والمساكين
باب اللي بيفتح طاقة لفلسطين
باب الغنوة والموال
باب ف جهنم الدنيا يليق بجمال
جمال الفجر بنقاءه
جمال المختلف عن روح ولاد تسعة بأخلاقه 
وجاء من أقصي المدينة يسعي بحيائه.....فمات مقتول
جمال يامه مكانشي نبي
لكن والله كان يشبه لكل رسول