ياللى عنيكى بتراقبنى
فى الرايحه وف الجايه
وأنت واقفه ورى شباكك
شايفك ورى المشربيه
واخده بالك منى دايما
لَمحتك بطرف عينيه
أنا عامل مش واخد بالى
عينك بردو معايا ماشيه
نفسى مره تقربيلى
أرمى حاجه وأندهيلى
زى زمان كانت البُنيه
تبعت رساله ف منديل
او توقعى ف المشابك
أو تقولى معايا شيل
زى م بتراقبى براقبك
يمكن أخطف نظره منك
أو يكون بينا سلام
وإيدى تلمس إيدك
تعبت كتير م المشاوير
لجل مالمح مره ضلك
بس خايف م الجيران
يجيبوا ف سيرتى وسيرتك
خَطوتى بتكون سريعه
مش بَلحق أتملى منك
نفسى أسمع يوم نداكى
أو حتى أسمع همسك
أخرجى بره الشباك
منيتى أشوف ملامحك
يمكن يتم المراد
قلبى بيتمنى قربك
( أسامه جديانه)