بيعدي العمر ، وسنين بتمر
حوالين القلب كتير ماتو
وسعات بتدور لقلوبنا تزور
والعقرب داخ من لفاته
سحباني الدنيا ف متاهه
والجرح غويط
محتاج تطهير والدنيا بخير
والعمر خلاص ساب نزواته
والخيط مش سالك ف الابره
دنيا كمان ماهيش صابره
والليل اهو فارق للقمره
عايشه ف زنزانه ومخنوقه
باتمني الموت
قلبى بيتعبنى كتير و الصوت
حاسه الايام بتطوحني
مغلوبه كتير انا علي امرى
والليل وامبارح طال صبري
وساعات بتضيع اوي من عمرى
وانا عايشه سكات
بستنى القاضى يقول حكمه
حكايات فى القلب كتير حكموا
مع ان العيشه بقت جبروت
دا السهل ف دنيتنا هيتباع
وف لحظه هتتقلب الأوضاع
الظالم راح يقلب مظلوم
وف عز النور هنشوفها غيوم
ماهو فعلا بقي صدق نفسه
وبيحلم كل الكون طاعه
بالوهم عايش اوضاعه
وشايفها حقيقه ف عين الناس
أما الحراس قالبينها مداس
فردين وشين بخشب ممطوط
و الواد متشخلع متدلع
بسيجارته الفاخرة وبيولع
ماشي بعجرفته المعهودة
والقمح وكلاه الدوده
وسنينا عجاف قوي مهدوده
ويباتها جعان ظلم الإنسان
لا تآمن أبدا للعشرة
ولا دهبك عمره يكون قشره
اياك ولا لحظه تعيش متهان
او مره تطاطي ف يوم لجبان
تعبان محطوط فوق شجرة توت
متخفي جوه ف اوراقها
بيبخ سمه وهو بعيد
ودموع الغدر المنقوعه
جايه بتشيع فى التوابيت
قولها وعيدها بقى لنفسك
أو تشغل بيها اوقاتك
اياك تمشي كده زي الخيل
حد يمسك سرج حياتك
عيشها مع نفسك و لوحدك
إنسي شعار الكل ا خوات
وبايدك راح تمسح دمعك
ولا حد هايسرق اوقاتك))
