امثال و امثال
بقلم..مرقص إقلاديوس
......
بيقولوا الأمثال..حكمة الشعوب.
عشان كلماتها بسيطة.
بيرددها اللسان..و تحفظها القلوب.
إنما فيه مثل
شرحه بيزود الألم فينا.
يقوللك ..
رضينا بالهم..و الهم ما رضيش بينا.
سألته
إزاى يعنى يا بلدينا.
انا اللى افهمه
إن واحد ما يرضاش بالهم.
إنما يرضى بالهم
و كمان الهم ما يرضاش بيه.
ليه..هوا فيه إيه
اشرح لنا
ينوبك ثواب فينا يا بيه.
الناس بتعرف الهم
إنه المعاناة و الغلب.
و إن الحظ فى الحياة
يبقى قليل و صعب.
عشان كدة الناس فيها
اللى بيجتهد و يسعى.
و اللى يريح دماغه
و يقول مش قادر و ينسى.
و اللى عشان يحقق نفسه
يجور على غيره و يقسى.
عشان الواحد مننا
يحقق اى انجاز فى الحياة،
لازم يجتهد.
و ينوى النية للخير.
و يقول يا رب
و يبتدى.
و
ربك وعد
إن اللى يجتهد
هينجح مسعاه.
و الخير
هيحارب اللى بيجاربوه،
و يكون معاه.
و إن
اللى يقول يا رب
فى الخير
دايما
هيتسمع نداه.
يجيله الهم دم منين،
ده الهم يحتار وياه.
سامعك بتعترض
و المثل..المثل
المثل غلط
يا صديقى المعترض.
لأن
اللى بيرضى بالهم
الهم بيرضى بيه.
ده كمان
بيصاحبه و ياخد عليه.
و إن لم يراجع نفسه و يهتم.
يعيش طول عمره،
مع الأسف ..مع الألم،
و ..هم ..يسلمه ..ل..هم.
صحصح
عشان تنجح
يا صاحبى.
ملاح بخور الحكمة
مرقص إقلاديوس
