إرحموا قلوبنا البريئَه
إتركوها لحال سبيلها
بزيادكوا كفانا ضيقَه
مِن حُروبكُم وانتقامها
حُرمِة ميِّت مارحمتوها
ونار الفتنه وبتضخُّوها
لا وفاكرين ان بتبنوها
وانَّها منكُم وانتُم منها
إفتحوا قلوبكُم جناين
واقبلوا فيها الجَّميع
خلوا طُهر النيَّه باين 
إلحقوها بلاش تضيع
وقتها ما يفيد خلافنا
ولا عفافكوا وعفافنا
والسِّنين تيجي بعجافنا
وبإيدينا نجني بيع
هو إيه أصل الحكايَه
لجل يبقىٰ فيه خلاف
غير عنادكُم مـِ البدايَه
اللي بيه كان لإئتلاف
إئتلفتوا علىٰ المواجع
واختلفتوا فـِ الجوامع
والطَّريق ملتوه موانع
وكُل دا بأسم العفاف
والنهاردَه لسَّه تاني
كُل حاجَه بتعيدوها
لسَّه خَدعاكوا الاماني
والمكارِه بتجيزوها
هي ليه طالِت نومتكُم
رغم أوجاعكُم زادتكُم
كُل دا وانتُم مازلتُم
رحمَه بينكُم بتوئِدوها

إرحموا قلوبنا
مسعد سليم