أنا والحظ
أنا بسيط ف الكون إنسان
أنا الغريب من غير عنوان
تايه وسط الناس ومكانى
متفرق بين البلدان
أنا والحظ م بينا مناعة
قالب وشه بكل بشاعة
ولما الفرح بيضحك ساعة
أعرف إن الجاى قطران
راضى ضميرى مسلم أمرى
حامد ربى وراضى بقدرى
حتى الصبر اشتكى من صبرى
وخدين عهد بقالنا زمان
حتى صبايا عشته وحيد
مرمى ف صحرا وبرد شديد
شغل ف فاعل شيل ف حديد
شوفت الذل أشكال و ألوان
كل بلاد مصر وحواريها
خطوة رجلى معلمة فيها
بحرى وقبلى وبضواحيها
كنت ب كار او باص او ڤان
جوايا ديما عايشة حكاية
أسمى يكون بطل لرواية
اصل الفن دا أجمل غاية
وانا جوايا أحساس فنان
كلمات وتأليف
الشاعر نبیل امین
