اهداء الى رفيق الدرب ( رضا عبدالهادى )
(((( ** بَـسِـــيـطَه ** ))))
*********************
عُمرك يا بسيطه فوق الخمسين
بتلاته
والفرْح اللى فى عمرك
يتعد على ايدين عم شحاته
أول فرحه أما اتجوزتى السيد
إذا كانلك شوره فى موضوع الجوازات
وان كان وضعك زى القريه المنكوبه
تبقى الفرحه الأولانيه ماهش محسوبه
والفرحه التانيه أما حملتينى
تالت فرحه أما ولدتينى
وقالولك واد
رضعتينى *** ولبستينى
ولعبتينى *** وأكلتينى
شربتينى *** وعلمتينى
وعنيك يا بسيطه
زى فانوس العربيه النقل
تقتل ضلمة ليلى فى عينى
واما وعيت
وكبرت معاك يا بسيطه
وسألتك عن ابويا كتييير
قولتيلى مســــافر
وأما سألت وكررت سؤالى
برضو جوابك واحد
واكتر من كام سنه بسأل
وتقولى مسافر
هو اللى مسافر يا أمه
مش يبعت برضو جواب
مش يبعت يتطمن على زرعُه
ويرد الشوق للأحباب
هو اللى مسافر يا أمه
لازم ياخد وياه مفتاح الباب
قفل الباب الصدا حاوطه
ولا عادت تنفع وياه المفاتيح
وقلوبنا بقت زى السمكه المسمومه
بتدغدغ فى عضامها اسنان التماسيح
هو اللى مسافر يا أمه
مفروض يبقى له ميعاد لرجوع
ولا يسيبنا لوحش الشوق يقتلنا
وان ما قتلناش الشوق
يقتلنا الجوع
***
شاعر القريه
فيصل بدر
١١تعليق واحدأعجبني
