((( آاااااه ياحظى )))
انى لسه ما فصَّلّْتِش
تُوب اليُتْم يا ناس
يا منال اتلمى
الناس بتبص وتتحدت
ها ودينى يا منال
الناس يلوموكى
***
بعد خراب مالطه يا مختار
الناس يلومونى
النبى لو نضحوا البحر بمِيت جردل
ما هينضحوا نُص دموعك يا عيونى
انى ضهرى خلاص اتحش يا ناس
من يوم ما المرض اشترى ابويا
والخِدمه فى دوركوا اشترت امى
من يومها يا ناس وانى زاد همى
مين اللى هيشتال همك
يا منال بعد نوال
قطعوك من سجره واحلامك
خُرم فى غُربال
يا تراب عضم الحبيبين
دِلنى من فين راحة البال
فينك يا شاهين تغسل همى
سبتينى فى الهم لمين يا نوال
يا ترى ياربى الدور على مين
بعد ما راحُوا وراح عبعال
****
طاب قومى خُشى الدار يا منال
سبنى يا مختار يا ابن الجيار
سبنى اغسل قهر سنينى السوده
وبا اقول يا سنين القهر اتلمى
يمكن طعم الهم يسبنى
وريحة الفَرْح تدوس على همى
سبنى اقرا الفاتحه
بقلبى المتشوق لامى
***
يا منال المغرب بغرُب
والليل زاحف عَمَّال بيقَرَب
وانى عارف حزنك
بقى فى القلب جبال
قومى خُشى الدار وكفايه
حرام يا منال
***
سبنى يا مختار
سبنى انعى همومى
النبى لولا عيبه يا ناس
لا اطْلَع من كل هدومى
من فيكوا يطمن قلبى المحتار
مين يقدر فى الدنيا
يطفى فى قلبى النار
***
طب قومى
اعملى راضعه للبت ولاء
سبها تعيط دى بلاء
سبها وسبنى أنعى الأيام
مالك يا نهار
عُدْت مِمَسِّى فى عِز شبابك
لا دخلنالك يوم
ولا مره نسينا ابوابك
اياكش نسيت
ان احنا اصحابك واحبابك
شَيِّبت الشَعَر فى راسنا يا ليل
ورضِينا بالعيشه على رحابك
ضَيَّعت شبابنا وحبايبنا
وختمت على قلوبنا بمخلابك
الهم صابغنا فى وجودك
والحزن مغطينا فى غيابك
غَيَّرت فى قلبى الفرح بجرح
وسقيتنى مرارك وعزابك
قومى بقه لعيالك يا منال
***
سبنى يا مختار انعى سنينى
لا القلب يا ناس بيرتاح
ولا بتْخِف دمُوع عينى
والله السر ما عاد سر
حتى ان كان بينى وبينى
علشان خاطرى تقومى يا منال
سبنى يا مختار
دا الهم فى قلبى جبال وجبال
*******
شاعر القريه
فيصل بدر
