غلطة سفر
ـــــــــــــــــــــ
والدى الحبيب المغترب
أخبارك إيه ؟ الصحه عال؟
والحسبه إيه وصلت لكام؟
وبرغم إنك كل يوم
تبعت رساله بيها تسأل عننا
أنا قلت حكتبلك جواب
أنا أصلى حرجع بالسنين
من يوم ما غبت وسبتنا
ووعدتنا هى سنه
من تانى حرجع وسطكم
أنا رايح اجمع فى الفلوس
علشان احقق حلمكم
بنتى الكبيره مهندسه
وابنى الصغير مستشار
والعقل طار
سابق بحلمه فى السنين
ووعدت أمى بالأمان
بس اللى كان
انك عكست المسأله
جبت الفلوس وسرقت فرحة عمرنا
عدت سنه وكمان سنه
وسنين كتير من غير عدد
زرعت أولها الأمل
كان الحصاد ضيعتنا
قصر الكلام أخبارك ايه ؟
طبعا تمام ... فكرتنى
بخصوص أخويا المستشار
فالعمر صار من غير سند
ساب الدراسه واعتمد
على قرش ابوه اللى اتبعت
من غير حساب
والصحبه كانت فاسده
أدمن حاجات من ضمنها
كِرهك قوى
أصل الفلوس من غير دفا
مابتشتريش غير الرخيص
أما المشاعر والأبوه
والحاجات دى كلها
عند اللى باع مالهاش تمن
إوعاك تكون
زعلان ياوالدى من الزمن
والدى الحبيب المغترب
أمى خلاص
سابت زماننا وسلمت
والعمر لسه فى أوله
زرعت سنابل حلمها
حلمت معاها تكمله
بس انت قلبك كان قوى
والدى الحبيب المغترب
أمى خلاص
راحت هناك عند القوى
صدقنى خاف
من دعوه كات من قلبها
قبل الوفاه رفعت إديها لربها
والقلب كان باكى وحزين
قالت يارب الطيبين
إنت اللى عدلك
راح يصيبه ف غربته
بصتلى قالت ماتخافيش
ربك معاكى ودعوتى
حضنتنى فارقت دنيتى
وسابتنى وحدى فى الحياه
والدى الحبيب المغترب
فى القلب آه
فى القلب آه على كام سؤال
إزاى عيونك كات تنام
وانت بعيد مش جنبنا
وبَعتنا ياما نطلبك
إرجع بقى .. إرجع بقى
إدى القلوب دى حقها
مش كل حاجه بالفلوس
والرد كان دايما بشيك
وهديه شيك
أما النفوس مالهاش تمن
إوعاك تكون
زعلان ياوالدى من الزمن
والدى الحبيب المغترب
سلملى طبعا ع المدام
واخواتى اللى ماشوفتهم
حاسين بإيه
وانت معاهم جنبهم
حضنك أكيد
مليان دفا يابختهم
صدقنى أيوه بحبهم
ما الجرح كان مش منهم
الجرح كان منك وليك
ما انا أصلى لما ادعى عليك
الدعوه توجعنى أنا
والدى الحبيب المغترب
إوعاك تعود تانى هنا
خليك هناك اجمع فلوس
مابقاش فى حاجه تضمنا
