بيـــــــــــــــــــت القصيــــــــــــــد للشعر والأدبالإعجاب بالصفحة
٢٢ ساعةسلوكيات مرفوضة
*****************
أول ليله ف شهر الصوم
تلقي الفرحه طول اليوم
بعد ما يمشي يوم واتنين
نرجع تاني لعهد النوم
تلقي الحال والبال اتغير
حتي النيه والمفهوم
اللي اتخيل رمضان هيصه
عكه وفته واكل لحوم
واللي اتخيل رمضان فرصه
يجري يدور ع المعلوم
واللي يفكر يلعب ضمنه
يفضل يلعب طول اليوم
لو نتعلم حبه يا ساده
نقدر نفهم معني الصوم
رمضان أصله نور وعباده
تسعد قلبك طول اليوم
واللي بيحلم بالاكلات
لما تشوفه تقول محروم
يتعب لما يشم حاجات
أه لو ريحة حبة ثوم
تلقي يا عيني الواد بيفرفر
نفسه ف حلة محشي يعوم
واللي سيجاره تبوظ صومه
بيها بيحلم طول اليوم
واللي يقولك سلي صيامك
علشان دغري يعدي اليوم
دا فلان قال دا فلانه عاد
نار بتمر علي البلعوم
تحصد تاكل ف الحسنات
حتي رصيدك لو مختوم
لو نتعلم حبه يا ساده
نقدر نفهم معني الصوم
رمضان أصله نور وعباده
تسعد قلبك طول اليوم
واللي يقول محتاج لأجازه
انا مش ناقص تاني هموم
إزاي يعني صيام ف الحر
وافضل طول اليوم محكوم
واللي يقضي صيامه أغاني
طول اليوم مع صوت كلثوم
واللي يتابع ف الفوازير
نفسه يلاقي فلوس بالكوم
لو نتعلم حبه يا ساده
نقدر نفهم معني الصوم
رمضان أصله نور وعباده
تسعد قلبك طول اليوم
واللي تقضي اليوم أكلات
إشي بسبوسه وإشي مبروم
تحفظ من كشكول فتكات
إزّاي تحشي وبالمفروم
نفسي نعيش المعني يا ساده
رمضان شهر عباده وصوم
رمضان يجي تفرغ نفسك
تمشي معاه ولآخر يوم
تقدر تجمع فيه حسنات
تقدر يوم الحشر تعوم
رمضان فرصه ف الجنات
إنقذ نفسك قبل اللوم
اللي يضيع شهر البركه
هو الخاسر والمحروم
واللي يخاف من حرّ النار
لما يلاقي الفتنه يقوم
لو نتعلم حبه يا ساده
نقدر نفهم معني الصوم
رمضان أصله نور وعباده
تسعد قلبك طول اليوم
رمضان يعني الناس تتعاون
تقدر تمنع أي سموم
رمضان يعني إراده وهمه
نبني جدار لو كان مهدوم
رمضان يعني الناس تتصافي
ارحم غيرك لو مظلوم
رمضان يعني الناس تتوحد
صفنا واحد مش مقسوم
رمضان يعني الناس تتعلم
أحلي عباده فيها علوم
.
لو نتعلم حبه يا ساده
نقدر نفهم معني الصوم
رمضان أصله نور وعباده
تسعد قلبك طول اليوم
