على اللي مش بإيدهم شي 
كتر الملامة فيهم بتولد الخنقة 
لو كنا نقدر ع الوصال كنا طوينا طي 
طول البعاد اللي عمل أزمة 
أو لو عرفنا ان اللي ماليهم زي 
هيظهروا تاني في حياتنا بالفاجئة 
وإنه مسير الحي في يوم يقابل حي 
كان يفترض هيكون لحياتنا يوم لازمة 
لكن مقدر لينا إن الجاي
لازم نعيشه بكل أوجاعنا 
فبلاش تلومي عليا وحياتك 
لأحسن خلاص معادش اللوم هينفعنا 
دفعنا من السنين أكتر كتير م الجاي 
ولسه ياما القلب شايل في أوجاعنا 
متفكريش إني كان بيدي أرجعلك
وحياته من جعلك ساكنة في تفكيري 
ورزقني أصعب وجع في حد تقديري 
تقصيري مش بيدي لكنها قسمة 
قسمت حياتي شطرين بدون رحمة 
في نص ضاع مني في الفكر والزحمة 
ونص مات مني بالغلب والحسرة 
وأديني تايه في دروب الدنيا والوحدة 
عايش في وسط الناس متخبي في هدومي 
كتير بكون بضحك من غلبي وهمومي 
وكتير بخبي الجرح والدمع في عيوني 
ولساكي بتلومي وتقولي إني نسيت
والله ما اتمنيت في الدنيا دي غيرك 
فمتزوديش لومك يومك خلاص مش لي 
انا واللي سواني وداري باللي بي 
لو كنتي شايفاني وشايفة في عيني ضي
فأنا ميت ومتكفن عليا جلدي حي 
كلماتي.......علي عفيفي