- الناس فترات
1/5/2019

👇
الناس اللي فاكرهم منك "بتزلك"
هتبيعك وهتمشي ف ضلك
مع انك لسة ف خانة اليك
ووشوشهم دايما مرسومة 
مابتزرع شك 
والحك اللي انت اتعلمته
اتحول عك
والطيبة اللي انت ادتهالهم
مع حبة ثقة م اللي ف بالهم
رسمولك قلب نضيف جدا
مابتعرف تغدر ولاحتي ينفع "تتفك"
ملعون العشرة واساليبها
مع ناس بتحب اللي ف جبيها
والوش اللي اتداري ف عيبها
ومعجونة بشك
ماهو كله كلام والناس زايفة
وصحابك دول فترة بسيطة
هتشوف الدنيا ماهي شايفة
ومشاعرك هي اللي عبيطة
وهتكره صنف البني ادمين
لما الاقنعة تتشال عنهم
وان جيت تسالهم راحتك فين
الرد هيبقي ف عنوانهم
فتحس ان انت ف دوامة
لما العنوان يبقي وشوشهم
وقلوبهم قاسية وهدامة
يبعوك علشان بس كروشهم
وهتكتم بركان احزانك
وهيعملو خايفين علشانك
وهتيجي تشوف نفس مريضة
بتهد الفرحة اللي بنيتها
وكمان تستسلم للحرقة
وهتندم انك حبيتها
ماهي نفس عقيمة وخداعة
بتسيب النار تحرق بيتها
وتشوف الناس دي غريبة بشكل
كديابة بتاكل جسمك اكل
وتحس ان انت رخيص جدا
انسان مش عارف ياخد شكل
اكمنك غيرهم مش منهم
لابتعرف تغدر ولاحتي ينع تتأقنع زييهم
لاهتيجي ف يوم تكسر عينهم
ولاينفع تتحكم فيهم
اصل انت اصيل جواك انسان
بيعيش ع الطيبة اللي بناها
ويادوبك هما بواقي حاجات
بتحطم احساس جواها
اتعلم انك متحبش
غير لما تعاشر قلب شاريك
تتونس بيهم ف غيابهم
وكمان ف غيابك يحكوا عليك
مش ناس حقيقتهم خداعة
ووشوشهم هي اللي بتغريك
حاسبين فترتهم بالساعة
وعيون بياعة ونساية
اتعود رجلك متدبش
ولاترسم ليهم ضحكاية
دول ناس "فترات"
بيهيئو ليك صورة جميلة 
ع شكل حياة مش مخدوشة
والارض اللي بتطرح نيلة
دي قلوب الناس المغشوشة
والبحر اللي شطوطه تغرق
بيفرق دايما خطاويهم
ومراكب جوفهم بتفرق
من غير متجمع خطاوينا
زي القبطان اللي اتحول
صياد بيجدف ف المينا
راميين لسيادتك سنارة
علشان يعرفو يجبوك بيها
ماهو دول الناس الغدارة
اللي انت ادتهم ثقة زايدة
وكتبت الشعر باسميها
دول ناس "فترات"
هتزين نفسها ميت مرة 
وتكون مرها ف سمومها
كسحابة متعرفش تطولها
ولاكنها بتكونلك ضلة 
وتفارقك لما بتتبخر 
وقت اما بتاخد فترتها
لاهينع تيجي وتتاخر
وكانها ماسكة عليك زلة
فبلاش تتعشم وحياتك
وبلاش تفضل انسان قلة
اتوحد مع نفسك تاني
اتعلم تبقي واحد تاني
عيش بس لنفسك وبنفسك
تقدر تتحول وحداني
واشتري راحتك وابني طموحك
واسحب الشهقة اللي ف روحك
لملم باديك كل جروحك
واتونس بيك
لتعاشر ناس مشكوك فيها
علشان متجيش تندم 
انك مبقتش اليك 
فكفاية انك بس عارفهم
زي القطط النكارة
وتعالب قاسية ومكارة
وتقول مكسبهم ده خسارة
واتكون فيك

علاء هشام