لو هفضفض باللى فيا
مش هلاقى كلمه ليا
توصف الحب اللى ساكن 
جوا قلبى وف عنيا
ياللى قلبك كون بحاله
حضنك انتى دنيا تانيه

اسم أمى حروف بسيطه 
بس معناه ضهر شايل
إسم أمى بدر نوَّر
عتمة الليل اللى طايل 
أمى يعنى خط أحمر 
يعدل الحال اللى مايل 
علمت قلبى المودة
شالت الحقد اللى زايل
بعترف بغياب حبيبتى 
إن انا لسقوطى آيِل

لسه شايفك لسه حَضنك
لسه كنت ببوس إيدينك
كنت حابب فيكى كُلِّكْ
لهفتك طيبتك قساوتك
لسه لمس الإيد خاطفنى
تزعلى وانا اجى أصالحك
لطمَه تنزل فوق خدودى 
تِفَوَّق الطفل اللى عارضك
واللا لما كنت برقد 
ببقا كل دوايا جمبك

نفسى أحكى عاللى خافت
عاللى ربت واللى شالت 
أمى شربت نار و علقم
عمرها ما لغيرها قالت
أمى صبرت أمى تعبت
مهما أقول..أنا لسه ساكت

سلوى إبراهيم