كان زمان الجد إمام
بيفسرلي كتير أحلام
ويسمعني كمان حواديته
لحد ماأروح ف النوم وأنام
جاب لي يوم كيس فيه عصير
وقال لي إفرش لي ياولدي حصير
وهات لي حتة مش م الجرة
وإملا ياواد الكوز م الزير
قولت ياجدي مش فى باءونه
طب حتة جبنة ويه زيتونه
قال لي ياواد إرضا بقليله
بدل العيش والمش يسيبونا
شويه وفات غمي شعبان
جدي قال له حط العدة
وأقعد جمبي هنا وإتغدا
قال والله ياعم تعبان
جدي قال تعبان من إيه
قال له مافيش فى جيبي جنيه
جدي قال ربك يفرجها
وإرمي حمولك ياعم عليه
وقعد جدي يحكي ف حواديت
وحكاوي كتير كلها عفاريت
قال كان ماشى ع الغيط فى العتمه
وشاف قال زفة وفيها زغاريت
قولت معقوله ياجدي بجد
قال لي بجد ياواد ياعبيط
قومت من خوفي لبدت ف جدي
طبطب عليا وباسني ف خدي
وقال لي ياواد دا كلام لخابيط

==================
الشاعر عيسى عبد الرؤوف