خواطر رجائيه
عصر الليمون،،،،،
كان املي يادنياتحققي أحلامي
أعيش فيك مبسوط في كل أيامي
أجري ورا الفرحه تسبقني وتتمايل
وتقول لسه يا صاحبي أنت بالهموم شايل
ناس بتظلم ناس وناس بتتفرج
وناس بتشرب المر ولا حد يتحرك
سألت نفسي وليه الدنيا معنداني
دايما تسعد الغريب وفي الهم سيباني
ضحكت وقالت إصبر والصبر أصله جميل
قلت لها أنا صابر بس حملي قوي وتقيل
أنا عايز صبر يصبرني علي صبري
بس سوق الصبر قفل بابه من بدري
رحت أشتريه لقيته في الطريق تعبان
ولما سألته بكي وقال أنا حزين ندمان
قال لي روح وامسح دمعتك وارضي بهمومك
خلي الطابق مستور وخليك في هدومك
بص جنبك هتشوف كتير ألم وعذاب
ياما مشاكل وهموم مقفول عليها الباب
إعصر ليمونه علي همك يمكن بها ترتاح
وتشوف همومك صغيره والدنيا تبقي براح
قالوا عليك إنسان سعيد بس الزمن غادر
والشيب ظهر بيضحك وللجميل ناكر
وخطوط الزمن علي وجهك بتتكلم
تقول أنا عمرك الطويل خلاص بقي سلم
داوي همومك بايدك واحملها علي ظهرك
إحمد ربك واشكره هو الوحيد سندك
بقلمي رجاء عبد الرازق
