شرين سعد أحمد

قصيدة / ( هي خيبة )
بقلم / ( شرين سعد أحمد )
شاعرة جنوب الوادي
#شرين_سعد_أحمد
****************
هي خيبة ولا أكتر 
هي نايبة ولا إيه
هي زي ما تيجي تيجي
فاضل إيه هنخاف عليه
،،،،،،،،،،،،،،،،،
هي حوسة مدارية
هي وكسة بالقوي
هي أزمة جاية جاية
تخلي قلبك ينكوي
،،،،،،،،،،،،،،،،،،،،،
حد منكوا بس عارف
إيه هيحصل بعدها
دي حياتنا موجها جارف
خوفنا مش هيصدها
،،،،،،،،،،،،،،،،،،
الكبير ياكل الصغير 
والسمك أحجام كتير
والأمور صبحت تحير
واللي جاي أكيد خطير
،،،،،،،،،،،،،،،،،،،،،
الشباب لابس محزق
والبنات يلا السلامة
مرة جينز وده ملزق
والبلادة بقت علامة
،،،،،،،،،،،،،،،،،،،،
يا جماعة خلوا بالكم
عقلي مش فاهم خلاص
قولوا يلا إيه جرالكم
سكة سد مافيش خلاص
،،،،،،،،،،،،،،،،،،،،،،
كله نايم ع المخدة
مستغطي باللحاف
والهموم علينا واخدة
والغموس بقى كله حاف
،،،،،،،،،،،،،،،،،،،
النفوس صبحت لئيمة
حقدها غل السنين
والشرور عاملة وليمة
والخلايق معزومين
،،،،،،،،،،،،،،،،،،،،
كله يهبش مش مهم
آخرته نارها لهب
مهما شاف وداق ف هم
بالحرام رزقه نهب
،،،،،،،،،،،،،،،،،،،،،
وضعنا عاوز مراجعة
أمته نرجع للإله
دي السنين معادتش راجعة
عمرنا جاب منتهاه
،،،،،،،،،،،،،،،،،،،،،،،
لو نتوب نلقى الفرج
والسكك متفتحة
عيشة جد مافيش هرج
والحياة متبحبحة

------------
4/2/2019