أتحداك
*********
لما تلاقى الكون حواليك
أصبح مجنون
وإن الأخ بيطعن أخوه
بحجر مسنون
وأن الحق صبح منبوذ
وإنك تظلم عادى يجوز
لما تشوف الدم بحور
وإلأجساد ع الأرض طابور
لما النار تصبح شىء عادى
والدخان بنشمه بخور
أتحداك
إنك تفصل بين الناس
مين العاقل والمجنون
مين بيحب ومين بيخون
مين هاتخافه ومين مأمون
أتحداك
تقدر تاخد أى قرار؟
عين ف الجنه وعين ف النار
كلنا وياك عايشين تايهين
مش عارفين
على فين رايحين
بس بنبكى ونشكى ونضحك
وبنتخانق وإحنا أخرنا
موت محتوم 
وننام ف الطين
تعمل إيه ؟
*********
محمد عبد المنصف