قصيدة بعنوان....... الخيانه

الخيانه جوه دمك
والملامح باقيه فيك
مهما توعد لسه غدرك
كل ليله بيناديك
واللى شفته ف عمرى منك
لسه بيفكرنى بيك
بعت أكتر قلب حبك
كان بيوهب عمره ليك
وقت خوفك كان يطبطب
وسط جرحك بيداويك
كان بيفرح وقت فرحك
وأما تغضب بيداديك
يفرش الارض ب وروده
يرسم الفرحة ف عنيك
يا اللى فاكر دى النهاية
بكره تهرب من ماضيك
لما كاس الظلم تشرب
والليالى تجور عليك
وأما تلقى ف لحظة نفسك
ف العذاب والخوف ماليك
واللى باقي بس ضلك
والجراح بتهد فيك
وقتها ياحبيبى تفهم
إن قلبى كان شريك
واللى كنت زمان نسيته
زى طيفك ح يرازيك
مهما تصرخ وسط ليلك
قلبى مش ح يحس بيك

كلمات الشاعر محمد ثروت