شرين سعد أحمد

قصيدة/ ( شقيانة وفرساني )
سجال مشترك بين
( شرين سعد أحمد. )
شاعرة جنوب الوادي
والشاعر/ ( علاء هشام )
******************
أ/ ( شرين )
أنا شقيانة مطحونة 
وشيفاك أنت مش حاسس
في شغل البيت ومعجونة
وعلى رأسي التعب دايس
،،،،،،،،،،،،،،،،
أ / ( علاء )
يا ستي إزاي دا أنا شقيان
في شغل الغيط ومصاريفكم
عشانكم بس نمت جعان
رقبتي لسه على سيفكم
،،،،،،،،،،،،،،،،
أ/ ( شرين )
وم الفجرية أنا قايمة
وبعجن عيشي بالمقدار
وأنت فشتك عايمة
بتتريق في ليل ونهار
،،،،،،،،،،،،،،،،،،
أ/( علاء )
نفسي تحسي بهمومي
وتكوني سند ليا
بلاش كل ما تقومي
تسودي يومي كده عليا
،،،،،،،،،،،،،،،
أ / (شرين )
ولا مقدر لتعبي معاك
ولا حاسس بمجهودي
وبعمل نفسي مش سامعاك
ودمعي سال على خدودي
،،،،،،،،،،،،،،،،،،،
أ /(علاء )
أنا مش فاضي لكلامك
وحججك أصبحت خايبة
الناس تعبانة قدامك
وأهي كل الحريم دايبة
،،،،،،،،،،،،،،،،،،، 
أ /( شرين )
ولو أطبخ أنا بصارة
بتزعل يومها وتهاتي
يروح تعبي وياخسارة
على أيامي وأوقاتي
،،،،،،،،،،،،،،،،،
أ/( علاء )
لو ع الطبخ بكفاية
تعبتي المعدة والقولون
عملتي المش ده حكاية
كأنه لحمك المضمون
،،،،،،،،،،،،،،،،،،،،،،
أ/ ( شرين )
غسيل لهدوم ده غير سجاد
بقضي فيها بالساعات
ومش لاقية لراحتي معاد
وليك الجنة دي تتفات
،،،،،،،،،،،،،،،،،،
أ/ ( علاء )
شربت المر على ايديكي
وراحتي مش لاقيها حرام
ولو همدح كمان فيكي
تقولي عليه دا أي كلام 
،،،،،،،،،،،،،،،
أ/ ( شرين )
وأولادك دا كوم تاني
وطلباتهم ما خلصانة
تقول قاصدين وبالعاني
ومنهم أصلي زهقانة
،،،،،،،،،،،،،،،،،،،،،
أ / ( علاء )
أنا بردو عايل همك
وشايل حمل فوق طاقتي
ياشيخة حسي على دمك
فقعتيلي كده مرارتي
،،،،،،،،،،،،،،،،،،
أ/ ( شرين )
وأما أقولهم ذاكروا
كأني يا عيني بشتمهم
وع التليفون بيتعاركوا
وشكلي تعبت أنا منهم
،،،،،،،،،،،،،،،،،
أ/ ( علاء )
لازم تبقي كده قوية
ماهي دي بقى العيشة
تملي منكدة عليا
بسببك دوست في الشيشة
،،،،،،،،،،،،،،،،،،،
أ/ (شرين )
وبتكبر دماغك ليه
ورامي حملهم ليا
شوفلي حل ارسي عليه
وحس مرة يوم بيا
،،،،،،،،،،،،،،،،،
أ/ ( علاء )
عشانكم طافح الكوتة
ومش هاين عليا اللبس
ديون مكتوبة في النوتة
ومين غيري هيدبس
،،،،،،،،،،،،،،،،،
أ/ ( شرين )
حياتنا أصلها شركة
ولازم إيد تساعد إيد
وفي مشاكلك أنا مشاركة
فمشيها بلاش تعقيد
،،،،،،،،،،،،،،،،
أ/ (علاء )
أنا والله بتمنى
تعيشي معايا في سعادة
ونحلم بس بـ الجنة 
ونرمي همومنا كالعادة
،،،،،،،،،،،،،،،
أ/ ( شرين )
نفسي المركبة تمشي
نوصلها لآخر البر
دا أحوالنا ماعاديتشي
هتتحمل لكر وفر
،،،،،،،،،،،،،
أ/ ( علاء )
بيكي هترسي مركبنا
لكن من غير نكد تاني
عشان الهم ده يسبنا
لازم تبقي ف وجداني
،،،،،،،،،،،،،،،،،،،،،
أ/ ( شرين )
عليا ربنا يهديك
وتعرف إني سدادة
أمانة ربنا يخليك
دا أنا استحملت بزيادة

،،،،،،،،،،،،،،،،،،،،،، 
أ/ (علاء)
ماليش فـ الدنيا دي غيرك
ياريت تستحملي شوية
ربطت مصيري بمصيرك
وأيامنا أهي جاية
5/1/2019

التعليقات