إنزل بلدنا اتمشى وفوت
من جنب شبابيك البيوت
تسمع ولاد ترقص تغنى
وناس بتحضن بعض تهنى
ناس مبسوطه كلها أهالينا
جرجس محمود وأحمد ومينا 
بعد سنين مفيهاش أمان
وبعد قنابل الدخان
وبعد الحرب وبعد الضرب
فكل العالم شرق وغرب
آن الأوان لبلدنا تفرح
ننزل غيطانا الفجر نسرح
ونقول لكل اللى قادها نار
كل اللى نفسو يشوفها دمار
الخطه بعد سنين انكشفت 
ودموعنا جوا عيونا نشفت 
بكفاياك يا شيخ أرجوك
أحلفك بأمك وابوك
كفايه تكسير فى الضلوع
كفايه فيه أطفال بتجوع
إرحمونا نبوس إديكم
طوب الأرض بيدعى عليكم
لو كان دا دين مش عاوزينه
حافظ عليه وياك وعينه
مفيش يا عم دين مع دم
حلفتك بالله تتلم
منير خاطر