وعشان متقولش مراكبيه
نعزم واحنا فوسط الميه
منغير ودودا ولا بغددا 
أنا عازمك عندى على الغدا
هطبخلك رز وملوخيه
وكمان قلقاس بالتقليه
وادبحلك وزه معاها بطه 
وحمام محشى رز بخلطه
وعمايل إيد خالتك سومه
مكرونه باللحمه المفرومه
وعشان منتا غالى عليا
هحشيلك محشى بإديه
والحلو قطايف وكنافه 
وطبق جلاش طعمو خرافه
واعملك شاى لما القاك جاى 
إكتب عندك هتجينى ازاى
إركب قطر عبدو القشاش
بيوصل مره وعشره مجاش
تنزل ف مدينة إسكت هس 
لا فيها كلام ولا تسمع حس
واسأل على شارع معرفشى
حود من حارة متخافشى
لو كان عندك حبة خبره 
فتش على بيتنا بالإبره
ونادى لو رحت من تحت
أنا عمرى مسمعت وفتحت
دا عشان متقولش مراكبيه 
نعزم واحنا فنص الميه 
منير خاطر