متابعة : رامي الشيخ
في ظل ما نعانيه من تخبط في الحالة الاقتصادية التي تمر بها بلادنا …بدأت أزمة السولار تعود من جديد والنتيجة معاناة الإنسان المصري لبحثه عن الوقود .. فالمواطن هو مغلوب على أمره وبعدسة البلاد شاهدنا حالات من السخط والغضب لما يعانيه السائقين والمواطنين .. وحاولنا فتح هذا الملف ما يدور حول هذه القضية فتابعوا معنا رأي الشارع المصري…
كيف أثرت أزمة السولار بين السائقين ؟؟
علاء السيد..سائق ميكروباص..39 سنة
أنا كل يوم بخرج من بيتي الفجر عشان اجى أقف في طابور اكتر من 5 أو 6 ساعات وممكن اكتر من كده أنا مش
عارف إحنا هنفضل كده قد إيه أنا بضيع يوم عشان أمون واشتغل يوم هكفي مصاريف بيتي ازاى أنا نفسي اى حد من المسئولين يجاوبني هي دى الثورة اللي عملناها عشان نحسن بلدنا .
حسن بلال 56 سنة ” سائق ميكروباص”
انا أب ل 4بنات من الطبيعي أنى اشتغل واتعب عشان أجهزهم وأشوف كل واحده في بيتها مكونة أسرة بس اللي بيحصل لنا في الأزمة دى عشان اقدر اكفي قوت يومي بس بقى شئ صعب أنا مش طالب ولا فيلا في الساحل الشمالي ولا حتى طالب قصر أنا بطالب بحقي أنى أعيش إنسان متوفر له كل شئ .
هاني محمود 28 سنة ” سائق “
كل اللي أقدر أقوله حسبي الله ونعم الوكيل في أي حد ناهب خيرك يا مصر وفي الأخر سايبنا نمد أيدينا وبنكح تراب ويا ريت لاقيين لقمة نأكلها .
مسعد البنا 50 سنة ” سائق نقل “
أنا عايز أعرف إحنا هنفضل لحد امتى كده فين سيادة الرئيس المنتخب فين الحكومة ولا رئيس الحكومة اللي سابب البلد بتولع وبيتكلم في أمور تانيه فين من كل اللي بيحصل لنا ده ؟؟
هل أثرت أزمة السولار على السائقين فقط أم أنها امتدت إلى الشارع ؟؟
السيدة سهام عبد القادر ” موظفة بالإدارة التعليمية “
أكيد أزمة السولار والبنزين أثرت تأثير سلبي لأن أولا الأجرة في ازدياد ومش عارفين إذا كانت الحكومة عارفة بكده ولا لا ، وتأثيره في حجم المواصلات بقت في تناقص لأنهم بيقفوا بالساعات عشان قدام البنزينه فأنا محتاجة أعرف موقف الحكومة من كل اللي بيحصل إيه ؟؟
نجلاء إبراهيم ” سيدة على المعاش “
يا ابني أنا كل يوم أقف وقت كبير جداً عشان اعرف أروح لبنتي واقعد مع أحفادي وبعيد عن كده كل سواق وليه أجرته الخاصة بيه واللي بيحددها على هواه مفيش أجرة ثابتة أنا عايزه اعرف الرئيس مرسي هيتحرك امتى ولا هو أخره أهله وعشيرته عشان يراعي مصالحهم أنا كل اللي عايزة أقوله ليه ” إذا دعتك قدرتك على ظلم الناس فلا تنسى قدرة الله عليك “
أحمد حسن ” طالب “
أنا طالب مغترب وأكيد أزمة زى دى أثرت تأثير كبير على البلد بحالها لأن ابسط شئ أنا مش بروح في مواعيد محاضراتي أنا عايز الناس تفوق من الغيبوبة اللي هي فيها الأزمة بدأت بالبنزين وجايز تنتهي بأزمة في المياه
اما رأى احد المسئولين فكان كالأتى
الأستاذ محمد نعمان وكيل وزارة التموين بمحافظة الدقهلية ”
يمكن أنا تصريحي قبل كده ومازال تصريح ده مستمر في وقتنا الحالي أن المشكلة تكمن في وجود نقص في المواد البترولية نابعة من وزارة البترول وان الحل للمشكلة إذا وجد التمويل وجد الحل وكان في بيان أصدره السيد الأستاذ الدكتور باسم عودة انه سيتم عرض قائمة بأهم محطات الوقود والتي سوف تكون أكثر التزاماً سيتم تخصيص حصص لها لمواجهة الطلب ، وأنا بطمن كافة المواطنين أن المشكلة ستحل في القريب العاجل بإذن الله “
مما سبق يتضح أننا نحيا أزمة وراء أزمة
فإلى متى سنظل مكتوفي الايدى هل بالفعل ستتضخم تلك الأزمة أم هل ستختفي والى متى ستظل الحكومة تكون في موضع المشاهد الذي يمرح بعرض هزلي لا تشارك فيه غير بالمشاهدة والتصفيق كل ما نتمناه أن تنتهي تلك الأزمة قبل أن تبدأ أخرى .
