إِبْعِدْنِي أَعْمِلْ لِمْلِيحْ === شْبِيكْ فِيَّ شَادِدْ صْحِيحْ

يِزِّينِي مَاعَادْ نْحِبْ === كُلُّو مْشَى مْعَ هَبِّ الرِّيحْ

يزِّينِي مِنْ كُثْرْ دْلَالِكْ === قْهَرْتَنِي يَا مَوْسِعْ بَالِكْ

بِعْتْ الغَالِي عَلَى جَالِكْ === لَاعُمْرِي شُفْتِكْ نْصِيحْ

قُلْتْ المَاضِي رَاحْ تْعَدَّى === تْكِفْ دْمُوعِي عَ المْخَدَّة

وْعَقْلِي الشَّارِدْ تَوَّة نْرُدَّهْ === لْقِيتْ حْسَابِي مَاهُو صْحِيحْ

فِي بَالِي نْسِيتْ هْمُومِي === نْسِيتْ مِنْ طَيِّرْ لِيَّ نُومِي

بَعْدْ رُخْسِي يَطْلَعْ سُومِي === نِتْقَعِّدْ مَاعَادْ نْطِيحْ

عْلَى حِلْمِي بْنِيتْ آمَالِي === بْنِيتْ صَرْحْ حْيُوطِي عَالِي

فِي لَحْظَة هَدّيتْ جْبَالِي === بْمَنْدِيلِكْ تْلَوِّحْ تَلْوِيحْ

إِبْعِدْنِي يَا وِلْدْ النَّاسْ === لْقِيتِكْ فِي المَعْصِمْ مِقْيَاسْ

حُبْنَا غَلْطَة مْنِ الأَسَاسْ === مِنْ أَوِّلْهَا مْرِيضْ جْرِيحْ

لَوْ تَرْجَعْ لِيَّ أَيَّامِي === وِنْشُوفْ خْيَالِكْ قُدَّّامِي

يْكُونْ مْعَاكْ آخِرْ كْلَامِي === لَانْحِبِّّكْ لَا لِيكْ نْمِيحْ

مَكْتُوبِي عْلِيَّ كَرْ === رْمَانِي لْذِيبْ مْنِ الْبَشَرْ

دْمُوعِي فَاضِتْ عَ الْبْحَرْ === إِبْعِدْنِي خَلِّيهَا تْشِيحْ

عبدالسّتّار زرّوقي
القيروان

02_5_2012

هاتف= +21626485378