ابْعِدْنِي أعْمِلْ الْمْلِيحْ
------------------------
كُلِّ النَّاسْ يْمِيحْ  عْلِهَا الرِّيحْ === ِوانْتَ هْبُوبِكْ مْشَبِّرْ ضِدِّي

عْلَاشْ شَادِدْ  فِيَّ صْحِيحْ === مْكَبِّشْ فِي خْنَاقِي مِتْحَدِّي

تْمَيِّـلْنِي وَقْتْ اللِّي تْمِيحْ === قُـلِّي شْنِيَّة حَاجْتِكْ عَنْدِي

تِتْهَنَّى وَقْتِ اللِّي انْطِيحْ ؟=== آش تَسْوَى حْيَاتِكْ مِنْ بَعْدِي؟

عَاِشرْتْ امْحَمِّدْ وِمْسِيحْ === لْـقِيتْ مِنِّكْ الفِعْلِْ يْهُودِي

لا لِكْ فِي ذِكْرْ وْتَسْبِيحْ === النِّفَاقْ مِنِّكْ يِسْتَجْدِي

دِيمَة مْكَثِّرْ مْنِ النّْبِيحْ === تْهَبْهِبْ عْلَى خْيَالْ المِتْعَدِّي

لَافَادِكْ مِنِّي تَصْحِيحْ === لَا تْهِمِّكْ مْلَامْة فِي رَدِّي

حَدِّثْتِكْ شَعْبِي وِِفْْصِِيحْ === مَا فْـْهِمْتْ الْمَعْنَى مِنْ قَصْدِي

لَامُخْ اسْتَوْعِبْ تـَلْمِيحْ === لَا جِلْباَتَهْ إِشَارِةْ يِدِّي

مَرْعُوشْ...الْمَشْيَة بِشْطِيحْ === تُرْقُصْ عْلَى مْقََامْ النَّهْوَنْدِي

مُنْشَارِكْ عَنْدُو تَصْرِيحْ === وَاكِلْ مِنْ لَحْمِي مِتْغَـِدِّي

لَاشَبْعِتْْ كرْشِكْ مِنْ شِيحْ === عِنْدِكْ زَرْدَة قْشُورْ الهِنْدِي

اليُومْ تِـتْـبَطَّّحْ تَبْطِيحْ === يَا مْلَا يِينُـو لَا تِتْشَدّي 

يْرَاهَا الغِشِّيرْ يْصِيحْ === حَاسْبِي تُغْلْطِي كِيفْ تْعِدِّي 

لَامَرَّة عَاوِنْتْ كْسِيحْ === لَاغَاضِكْ اللِّي بْرِجْلَهْ يْرَدِّي

ابْعِدْنِي أعْمِلْ الْمْلِيحْ === لَا يُومْ لْـقِيتِكْ مِنْ نَدِّي

مَرَّة عَرْكْ وْمَرَّة نْطِيحْ === صَعْـلُوكْ عَاِيشْ وْبَانْدِي

آشْ جَابْ فِعْلِكْ القْـبِيحْ === لْوِلْدْ الأَكَابِرْ أَفَنْدِي

بْكُلِّكْ فُضْلَة لِلتّـَلْوِيحْ === لَا تَسْوَى شَعْرَة مِنْ زِنْدِي

نَلْقَى عُودِكْ جُرْحْ القِيحْ === لَا يِقْدِي نَارْ وْلَا يْسَدِّي

عبدالسّتّار زرّوقي
القيروان
2012-03-10