قالوا هذا بوهالي
حالي فوق حوالهم كاملين
ياسيادي مابقى اديالي
بدموع ياك مابقاو لي عينين
ياك ادى عقلي وزاد بالي
خلاني لليل بطولو
ونجوم ياك فسماها شهادة
وخيالات الخوف يصولو
اسراب معاشراني عادة
مسكون وكيف ندير ياناس
مجدوب حالي وبلى خباري
ناس نايمة وانا هنا عساس
امريض في حالة ماباري
هذي قصتي امتى تسالي
طالع نازل زايد نقلب
عارف حدورة زايد جبالي
عقدة ف حياتي ماتكذب
ياك قالوا هذا كايخربق
يسبقني لكلام بمعانيه
وانا ف الحال ياك مطوق
مدفوع ياسيادي وانا فيه
نشكي لله من ارماني
وتوابعي لجنية ولبشر
من كان ليا سباب وبلاني
بعداوتو سيادي وزاد غذر
ياك وصلت لكل الاولية
شاكي للي كاويني وشاوي
راه تالف مصابي ولبلية
ف طريقي وجلوسي داوي
حضرت مانفعتني حضاري
ياك جذبت قديم وبالي
هذا حالي ليل ونهاري
كلمرة ف ضريح عايش خبالي
ياك قالوا هذا بوهالي
وانا غادي ماعارف فين
ماعارفني غير للي بحالي
ساكني ماعرفتو امنين
تايه هنا ولهيه كيف الريح
داخل حلقة ماعندها باب
لمكان عندي تالف ويصيح
وافين ناسي وافين لحباب
هذا مزمم علينا مكتاب
وعليا زايد يتصرف
هذا جاي من الصحبة ولصحاب
والناس تقول كايخرف
طالب لعفو من مولانا
يهدي هذا الناس وعلى الناس
وحنا بيدو ماينسانا
حالي بحر ما يعرفوغطاس
كلمات صقر اللحروف الزجال بوسبولة المحجوب
