هسافر
احمد صبري

هسافر
ايوه م الاخر
منيش ناسي
ولا فاكر
ولا قلبي ع الفراق
قادر
لكن يا حبيبتي سامحيني
مبقتش بقدر
اعافر
هسافر

هتوحشني لياليكي
وهتغرب ف ايامي
وهتعذب انا بيكي
لاْن عنيكي احلامي
وانا سايبك تبوسيني
وشايلة الدموع عيني
بحبك ايوه ضميني
لكنك لما هتنامي
هسافر

معرفتش لفين رايح
ولا حتى امتى راجع
ندهت وصوتي رايح
طبعا محدش سامع
اعز الناس تخون قلبي
اهلي وناسي وحبايبي
احتاجتهم مالقيت جنبي
الكل كان بايع
هسافر

هسيب ايامي وسنيني
وهبعد حتى عن نفسي
ومهما هتعب بحنيني
اتمنى انتي ماتحسي
يمكن السنين هتفوت
يمكن يبقى بينا صوت
يمكن الغريب هيموت
وانتي كمان تنسي
هسافر

تحياتي
احمد الفنان