(( الرف الخامس ))

احساس مدروس
بين فصله وقوس
وحنين ملموس
بيدفينا
بين لهفة وشوق
نظرتنا لفوق
بتعدينا
تسبقنا وتسرق خطوينا
وتقول وتكرر اسامينا
من اول سطر
لأخر سطر
القصه بتوصف حكاوينا

تدارى تملى ف ثالث صف
ف نفس مكانها بقالها سنين والكون بيلف
رافضه تكون عنوان ف ملف
قابله بكل دموع الدنيا
بس عشانها ف خامس رف
عايشه سنين بتدارى وجعها
بمليون حرف
شاكه ف كل عيون الناس
خايفه تسف

انا وانتى الى قرينا القصه وعايشين فيها
اسامينا انكتبت جواها
من قبل ما نفهم معانيها
من قبل ما يخترعوا الفاصله
كات واصله لكل الى غاويها

القصه مش قصة حب
لارض وحارس
القصه مبادئ
مابتتقالش ف اى مدارس
القصه اتكتبت قبل الكرسى
ومنغير فارس
يامصر هنفضل طول عمرنا
ف الرف الخامس

بقلم اسلام ياسين
8 مايو 2014