قصيدة عامية تحكى مأساة حقيقية
بقلم الشاعر الشيخ محمد شرف
**** الأب البديل ****
يادنيا مالك كده دايماً معندانى
عمال أحايل فيكى وإنتِ ظلمانى
عمرى ما كنت فى يوم ظالم ولا جانى
دا أنا بحب الكل وبرضه نسيانى
وليه يادنيا كده دا الطيبة عنوانى
وليه يا أبويه تبيعنى والحرقة قتلانى
وألاقى غيرك شارينى والبسمة مفرقانى
راح الحنان فين ؟؟ والهجر كمان جانى
هفضل أدور عليه من وقت للتانى
وليه يا أمى تجافينى وبرضه بيعانى
نفسى أحس بحضنك وألاقيكى ضمانى
بس دا حلم بعيد وللهجر سقيانى
وأبويه هجرنى خلاص والحزن سجانى
وإنتِ يا أمى كمان للوحدة رميانى
وفضلت أبحث عن الحب من تانى
وجه أبويه البديل بعطفه غطانى
هو الأمل والمنى وحنانه خلانى
أنسى أبويه الحقيقى وأنسى هجرانى
يادنيا .. ياأحزان .. دايماً محصرانى
وليه قسواتك علىَّ دايماً وطعنانى
ساعات بحس بناس قلوبها محوطانى
وأبويه وأمى خلاص الطبع دا أنانى
بابا كمان البديل مصرى اسكندرانى
سقانى عطف وحنان فاق اللى ربانى
كفايه قسوة وظلم من دنيا قتلانى
حتى أبويه البديل ناداه إله حانى
يارب بدعيلك وأجيلك من دنيا نسيانى
اغفر إله الكون لأبويه التانى
حبيته كمان بإخلاص والحب عنوانى
غلبت أصالح دموعى والدمعة غلبانى
يارب اغفر له وسامحه دا أحن انسانى