أغنية هييجى اليوم
....................
هييجى اليوم وتنسينى
وتنسى أنك قابلتينى
وداع ياحب مكملشى
ياحلم جميل ما طولشى
ظلمتك أيوه أنا عارف
وأنا من دمعتك خايف
أبوس قلبك تسامحينى

أنا قربت لك أيوه
عشان أنسى غيرك بيكى
ولا نسيت اللى فى قلبى
ولا قدرت أبقى يوم ليكى

ضميرى قال مفيش داعى
أسيبك عايشه فى خداعى
فتحت بأيدى أوجاعى
بعدت وبعدى على عينى
هييجى اليوم وتنسينى

حرام بمشاعرك أتهاون
حرام ألعب بأحلامك
وأخبى حاجه فى قلبى
وأبين غيرها قدامك

بعدت لأنى مش ليكى
هربت وجنتى فيكى
وخفت بنارى أكويكى
ونار جرحك لتكوينى
هييجى اليوم وتنسينى

بنعتب ع النصيب ونلوم
ونجرح روحنا بأيدينا
نسيب اللى بيسعدنا
ونجرى ورا اللى يشقينا

خسرتك أيوة أنا خسرتك
بقولها لو تيجى سيرتك
وأدينى بحزنى وبصورتك
رجعت ودمعى مالينى
هييجى اليوم وتنسينى

......................................
كلمات وغناء /حمدى الهادى
لحن وتوزيع /اسماعيل العقيلى
القيت فى مؤسسة نجلاء محرم
الثقافيه ونشرت بمجلة المرأة اليوم