ما تبكيش عليا ********** بقلم الشاعرة صفاء عبد ربه

مشاعر جميلة

ما تبكيش عليا
**********
ما تبكيش عليا
لو بعدت ولا مت
ما تبكيش عليا
ما تبكيش
يا أغلي عندي
من روحي ونور عنيا
ما تبكيش
يا ضي عيني
ولا تسأل يوم عليا
ما تبكيش ..
يا كل ما ليا في الدنيا ديا
أنا كنت حساك انك ابني
وكنت خايفه يوم تسبني
وانت..كنت دايما تاعبني
وتأسي عليا وتظلمني
كنت أتابعك من بعيد لبعيد
وعيني تبقي دايما عليك
وما أنام الا لما أطمن عليك
ما أنا كنت ياابني عايشه ليك
كنت أتابعك وأراعيك
كنت أحس بالي فيك
أخس دايما بحالك
وأعرف انت مالك
وايه ياابني جرالك
لما عيني كات تيجي في عينيك
ولا ايدي تلمس ايديك
ولما أعرف ايه اللي بيك
يزداد خوفي وقلقي عليك
و تبقي حيرتي ما تنهيش
ماانت ياابني زيك مافيش
وعلشانك أنا كنت باعيش
وكأن غيرك .. أبدا أنا ماليش
وكنت باأتمني ..
ان عمري ما ينتهيش
ولا تبعد عني بعيد
قبل ما شوفك سعيد
وأشوفلك ياابني وليد
و تكون صورته
نفس صورتك في قلبي
وأضمه بايدي لحضني
وأحس نبضه جوه صدري
بس ياخساره ..
بس ياخساره الفراق
أقوي مني وأقوي منك
هو اللي بعدني عنك
ماهو مش بايدي أو بايدك
دا كان نصيبي ونصيبك
ان طريقي غير طريقك
ودلوقتي ..
دلوقتي أنا جي أقولك
اوعي
اوعي يوم قلبك يضلك
ودموعك تيجي .. وتذلك
لما تعرف في يوم انك
جيت عليا , وظلمتني
جرحت قلبي . وخنتني
ساعتها ..
ساعتها راح تخونك
زي انت ما خونتني
وبردوا راح تسيبك
زي انت ما سبتني
وانت راح تجيني
وتقول خلاص سامحيني
و هاتندم
علي انك غدرت بيا
وروحت خزلتني
وجيت عليا وظلمتني
وتقول خلاص عرفت
ان كان نفسك تطمني
وراح تيجي وتبكي ..
علي انك نهرتني
وتقول انك فعلا . خسرتني
وان جيت في يوم مكاني
أ كيد مش راح تلقاني
ولا هاتلقي نفس حناني
راح تلقي قلب تاني
صعب انه يحن لك
راح تلقي قلب تاني
أصبح من غدرك أناني
ونبضه مش هو نبضه
ماهو وقف من قسوتك
وراح تلاقي قلب مات
يوم لما كان معاك
وقسيت عليه وجرحتني
وبالرخيص . ياابني بعتني
ودلوقتي جي تبكي
تبكي وتقول خلاص
خلاص رجعتلك
لأ . لأ
أنا عمري ما هاسامحك
ولا هاقدر أنسي جرحك
يوم ما جيت أصالحك
وانت نهرتني
ومشيت عني يومها
وفي الطريق سبتني
أنا ما كنانشي قصدي جرحك
ولا كنت أقصد أضايقك
بقلقي وخوفي عليك .
أنا كان في بالي أصالحك
وأشاركك دايما في فرحك
لكن .. لكن انت بعتني
وجيت و زدت جرحك
وفي الأخر سبتني
خلاص
خلاص أنا مش هاضايقك
ولا راح تاني أصالجك
ولو ليا يوم وافتكرت
واني بسببك أتألمت
وعلشانك أنا
أنا ياما سهرت
وياما خفت عليك وقلقت
بردوا
بردوا ما تبكيش عليا
دا دموعك غاليه عندي
وأغلي من نور عنيا
وانسي
انسي قلبي اللي حبك
انسي حضني اللي ضمك
وافتكر اني كنت أضايقك
بخوفي وقلقي عليك

صفاء عبد ربه